حرام

غاط كمن يوم ومندمج مع رواية دان براون الجديدة، وفجأة ومن دون مقدمات إنصدمت

والله حرام

إفتتاحية جريدة الوطن اليوم شي ما صار ولا إستوى

يعني إلحين مو كافينا مشاكل وفضايح. إش ياب طاري هالسوالف إلحين

الكويت ماهي ديرة ملائكة ولكن التحقيق الصحفي - إذا سميناه تحقيق ، بعيد عن الحرفنة والمصداقية

إشوية صور من موبايل على كلام مثير قص ولصق من غير دليل

المهم إثارة موضوع حساس وخل الدنيا تنقلب ،خصوصاً باكر النواب المعروفين راح يردون وهات هيصة وزمبليطة لمدة كم يوم على نفس الموضوع

لا حول ولا قوة إلا بالله، حرام إللي قاعدين يسوونه بالديرة والله الكويت ما تستاهل

آنه أذكر بالثمانينات بعد سالفة التفجيرات، الكل كان يسأل ليش شوية من أبناء الكويت سووا إللي سووه بديرتهم

واعتقد بعد ما زاد الضغط، طلعت لنا سالفة الجنس الثالث وهات ردح ليمن صرنا مسخرة بالمنطقة بس عشان نغطي

وسالفة الوطن اليوم تغطية بس على شنو

حرام إللي قاعدين يسوونه بالديرة والله حرام، الكويت ما تستاهل

من غير عنوان

أولاً مبارك عليكم الشهر

ثانياً عيدكم مبارك (يعني صايد الحركة قبل العالم كلها)

اشوه أول مرة رمضان بالكويت شيعة وسنة متفقين، بس إذا فيهم خير يتفقون على العيد

فكونا رحم الله والديكم

آنه واصل حدي

ما أفتح الجريدة إلا شيعة وسنة، مناهج وزيارة قبور

هايف ودويسان من صوب  والحين الشطي والمهري

بس خلاص زهقتونا

يعني إلحين إذا الشيعي صار سني ولا السني صار شيعي خلاص مصايبنا إنتهت

لوعتوا جبدنا

ويا حب ذيك الجريدة للفتنة

يبه تدرون إشلون

نجمع كل كتب الشيعة وكل كتب السنة ونحرقها

ونبدأ من البداية

لا هذا يقول الكتاب الفلاني ولا ذاك يقول الكتاب العلاني

خلاص فكونا

لا بارك الله في الطائفيين والله لا يربحهم زين

إرحموا

صحف اليوم تناقلت خبر الرئيس الفلبيني السابق لمتابعة أحوال العمالة بالكويت

وطبعاً شاف شي ما سره. أحد الروابط للموضوع هنا.

آنه ما ألومه.

قبل فترة كنت زاير أحد المطاعم إللي على البحر، وعلى كراسي الإنتظار أحد العاملات المنزليات من منطقة شبه القارة الهندية ناطرة وبجنبها عربة أطفال

العائلة داخل تأكل بما لذ وطاب وهذه المرأة تنتظرهم

قلت للجماعة إللي معاي: هاذي أسرة إنعدمت فيها الإنسانية. فهل من المعقول أن تأكل الأسرة بينما تنتظر هذه المسكينة؟ كثيراً ما ألاحظ هذه العادة من الأسر باصطحاب العمالة للمطاعم وتركهم ينظرون للموائد وقت الغداء دون أن ترف لهم رمشة من الخوف من الباري عز وجل

بل الكثير من يجلسها على نفس الطاولة دون أن يطلب لها أي وجبة

والله لقد فضحتنا هذه النوعية من الأسر، تذكروا يوم كان أجدادكم يشقون في سبيل اللقمة والله حرام هذه السمعة السيئة لوطننا

وأخيراً إرحموا من في الأرض يرحمكم من في السماء

من ١٩٩٦ الى ٢٠٠٩

اولا نبارك لمن فاز بثقة اهل الكويت واخص اخواتنا عضوات مجلس الامة

اتذكر في هذة اللحظات ذاك اليوم الصيفي في سنة ٩٦ وبالتحديد عصرا عندما وقفت مع اخواتي الكويتيات امام احدى المدارس في منطقة مشرف ونحن نطالب بحقوق نساء الكويت السياسية

ابتسم في هذه اللحظة وانا ارجع بذاكرتي للوراء عندما حاولت الدكتورة رولا دشتي الاندفاع واقتحام المدرسة ولولا لطف من الله لكنت الوحيد الممدد في النظارة بالمخفر كوني كنت الرجل الوحيد بين النساء المتظاهرات لحظتها

ولكني الآن أفخر بهدوء الكتورة

هنيئا للكويت بناتها وأبنائها أيضاً

جميعا. لننظر للأمام ولنترك الماضي والمهاترات. فالوقت ليس في صالحنا

+++++

الاستاذة ذكرى الرشيدي. والله لقد علمتينا درس بان كل شيء بالامكان
لقد خذلناك هذه المرة ولكن وبإذن الله نحن معك في المرة القادمة

تصويت

بما إن محد سألني عن رايي ببعض المرشحين بالدائرة الثانية (الصليبخات وتوابعها)، فحبيت أجيب من الآخر حول بعض المرشحين

جاسم الخرافي: لازم واحد ينافس أحمد السعدون

خالد سلطان بن عيسى: عقب ذيك السالفة مالك أمل

خلف دميثير: وهل يعقل ما نصوت لملك الصليبخات الغير متوج

راشد الهبيده: مثل مكيف أل جي، ماله صوت بالمجلس موليه

عبدالله النيبارى: لما الضاحية كانت إبروحها ما طلعت، عيل الحين شنقول

محمد د المطير: كنت ناوي، بس عقب  سالفة الإعلان، هونت

مرزوق الغانم: بوعلى لو تجابل نادي الكويت مو أريح

نواف ابوشيبه: بقط له صوت، شسوي جيران أخت أبو إخت ولد أخوي

أحاديث من الصليبخات - رامبو

جارنا في الصليبخات، حجي أ رحمة الله عليه كان خوش ريال ولكن كحال الشياب ما نسوا النزاعات القديمة.

الحال بينه وبين الوالد رحمة الله عليه أغلبه مد ولكن كان فيه جزر

حجي أ ومن يوم ما سكنا بالفريج، من 1973 وعادته كل يوم العصاري، يطلع الهوز ويرش الماي مجابل بيته.  بيتنا من سوء الحظ، منهول ماي المطر يقابله.  وكل عصرية، الماي والطين والوصخ بالمنهول إللي الوالد كل شهر رايح الجيوان وجايب عامل يسلك المنهول

*****

أنه: مساك الله بالخير يمه (ويه الوالدة رحمة الله عليها معتفس)

الوالدة : مساك الله بالخير يمه

آنه: عسى ماشر

الوالدة: أبوك قص ويهي عقب هالسنين.  آنه ألحين وين أودي ويهي من أم فلان (تقصد زوجة حجي أ)

آنه: إي إشصاير؟

الوالدة: روح إسأل أبوك

آنه: مساكم الله بالخير،  سالسالفة؟ (الوالد وبعض الأخوان بالصالة)

أخوي (ما خذني على كتر ويساسرني وهو يضحك): الوالد صار رامبو اليوم ما دريت

أخوي الثاني (المعصب): أبوك بغى يذبح حجي أ

آنه: شنو؟؟؟!!!!!!؟؟؟؟؟؟

أخوي المعصب: حجي أ كالعادة يرش الماي وقوم أبوك يعطيه ذاك البكس ويزنطه

أنه: أوه أوه أوه!!!!! ليش

الوالد: لا مو جذي. كان يرش الماي، قلت له يا بوفلان الله يرضى عليك تلفتنا كل يوم وهذي حالتك طين وغيله.  ألحين بلطت جدام بيتك وييت عند بقعة هالكبيراتها وخليتها تراب بس عشان تأذينا بالطين.  يبه آنه أبلطها لك على حسابي بس فكنا

يرد يقول لي كيفي جدام بيتي وأسوي إللي أسويه

ويقوم يرش ماي زيادة وطشر الطين علي

ما وعيت إلا وآنه لاكه بكس وقاعد على صدره

آنه (والضحكة تغلبني) : عسى بس ما صار فيه شي، حجي أ توه مسوي عملية بقلبه

الوالد: تحاتيه؟  حاتني آنه رفع الضغط والسكري عندي.  منعمي آنه ألحين ماني قادر أشوف كلش ودوني الطبيب

أخوي المعصب: مو هذا إللي كنا خايفين منه

الوالد : ما أدري.  أنه من دون النظارة أشوف أحسن

آنه آخذ النظارة من الوالد: أشوف يبه

بعد لحظات

آنه: الله يهداك يبه، هاذي نظارة حجي أ

أثاري الشياب عقب الهوشة كل واحد ماخذ نظارة الثاني