إحسينوه تتن تتن

كل ما أتذكر مقطع بوصالح يحاچي إقحطه ويقول له إحسينوه تتن تتن، يعني يدخن زقاير بمسلسل درب الزلق، أتذكر سالفتنا بصليبخات ذيچ السنه

شاطي الصليبخات كان كله طين، ألحين إشوي بعد الدفان صار أشوه من قبل. المهم السفن والمراكب بين فترة وفترة كانت تقط بلاوي بالبحر وينتهي فيها المطاف على اليال عندنا. إشلون ما أدري، بس شغلات غريبه عجيبه تنقط. مجلات خلاعية، إبطول ويسكي باقي فيها إشوي، ملابس إلخ

ذيچ السنه شي عجيب. تقول كونتينر ستعش قدم قاطينه بالبحر. كراتين زقاير إوصلت صوب المنطقه ما بين قطعه واحد وأثنين. والنوع كان غريب چنه من أوروبا الشرقية أو شي چذي.

المهم، إنتشر الخبر. أمم أمم ركضه صوب البحر. كراتين قاعده تنشال. يمكن ثلاثة أيام بلياليها وعيال القطعتين واحد وأثنين، وأعني من كل الأعمار. طاحوله سحك بهالزقاير. واعترف بأني دخلت عالم التدخين ذاك اليوم. تصوروا ثاني يوم، الشباب الصيّع وزعوا زقاير عل المدرسين بالمدرسه. أنا أتكلم كروز مو باكيت. وريحة التتن چلبت بالجو. من كثر الوفرة قمنا نتحاذف فيهم.

بس السالفة ردت عايدي علينا، الظاهر النوع كان چيب ورخيص. يعني الكحة ظلت فترة مع الكثير ياللا فچت منهم. هذا غير خساير كلونيا بوبنت عشان نودي الريحه. بس مو هذي السالفة.

بالنهايه الأهل طبعاً إعرفوا. يعني مستحيل سالفة مثل هذي تنخش، بس إشلون. ولا أثاري واحد من ربعنا بالفريج أمه طاحت عالباكيت إللي ناسيه بدشداشته.

تطقه وتعايره، شوف فلان أحسن منك ما يسوي سواتك. تدرون سوالف الأهل، فلان أحسن منك يذاكر. علنتان لا يصير أشطر منك وهكذا.

ولا صاحبنا، بيسوي روحه أحسن. چان يقر. اصلاً فلان هم يدخن. وليه ولا الخبر كله عند الأمهات. كل ما واحد إنصاد قر عالباجين. صادونا واحد ورا الثاني. الظهر ما تسمع إلا إصراخ الشباب بالفريج وخيازرين تروح من بيت لبيت. المهم تشلخنا طق ذاك اليوم. طق فينا إلين جلدنا إلتهب.

شالله حادنا، ما أدري.