رواية فاصلة منقطة – الجزء الثالث عشر

الزمان : السبت – 6 / يوليو / 1996 – الساعة الواحدة والنصف ظهراً
المكان : مبني رقم 1 – المبنى الرئيسي - الهيئة العامة للأبحاث والدراسات العلمية

"وإنت إشتعتقد؟" يسأله بوطلال.

"الشباب يؤكدون إن إللي صاير هذا شغل هاكر وأغلب الظن هاكر فروم آوت سايد، وآنه أوافقهم. الشغلات إللي صايرة تدل على تغيير بشري بفعل فاعل ومانيوال. مافي برنامج يسوي هالتغييرات، مستحيل، إحنا واثقين" يشرح صلاح.

"يمكن واحد من الهيئة" يرد بوطلال.

"نو ويه. أللي مسوي هالشغله يعرف يونكس. وإللي يعرفون يونكس بهالشطارة بس موجودين بمبنى الكمبيوتر. ومستحيل ربعنا يسوون هالشي" يشرح صلاح.

"طيب إشلون هالشي صار ، وإنتو وينكم" يسأله بوعبدالله محاولاً إحراجه.

"كنا نايمين" يرد صلاح باستهزاء.

"الظاهر چذي. لو مسوي شغلك عدل چان ما صار هالشي" يرد بوعبدالله.

"صدقني، إنت ماتعرف لو آنه مسوي شغلي ولا لأ، فما بالك إذا كان عدل أو مو عدل" يرد صلاح.

"بس خلاص" يأمرهم بوطلال بإنهاء الحوار، "تبون تتهاوشون عندي".

"صلاح المفروض منكم تكونون حذرين أكثر من چذي" يحدثه بوطلال

"بوطلال، البرڤنتف مينتنانس كان جزء من الخطة التشغيلية هالسنة،بل إن الصيانة الوقائية من أهم العمليات في أي خطة تشغيلية. بوعبدالله لغى هالفقرة من الأوپريشن پلان، ألحين إحنا ننلام على هالشي!" يوضح صلاح ويؤشر على بوعبدالله.

"الحبيب لغى التريننغ كورسز للشباب. لا دورات لا تدريب لا عمات عين. إفلوس التدريب تحولت بقدرة قادر من بند المخصصات التدريبية في الميزانية، إلى مخصص السفرات وسفرة حق جايتكس بدبي حق بو عبدالله، إشلون ما أدري" يرمق صلاح بوعبدالله ولسان حاله يقول له ما في شي ينخش بهالهيئة.

الضيق باين على وجه بوعبدالله وبوطلال يلاحظ ذلك.
"خلاص خلاص، هذا ألحين مو موضوعنا، إشتقترح نسوي يا صلاح؟" يسأله.

"لازم نطفي السيستم إميدياتلي" يجيبه بوعبدالله.

"شتنغ داون السيستم ويل ريز هيل" يجيب صلاح، " إحنا مرتبطين مع هيئات ومؤسسات دولية ما نقدر نقطعهم عن شبكتنا چذي فجأه. وقبل لا نخطي هالخطوة لابد إنا نكون مزهبين روحنا إشناوين نسوي. ثاني شي الشتنغ داون معناه تحذير للهاكر بوجود خلل يخليه ما يرد ..." وقبل أن يكمل

يقاطعه بوعبدالله "عساه ما رد". "بوعبدالله رجاءاً خلنا نسمع، كمل صلاح" الضيق يظهر على وجه بوطلال.

"مثل ما قلت الخوف إنه يروح وما يرد. ردته وإحنا متوقعينه معناته معرفة حجم الخراب إللي مسويه ووين وبأي جهاز. طبعاً إحنا راح نچيك من صوبنا ولكن وجوده راح يساعد وايد" يوضح صلاح.

إحنا إشلون طوّفنا صلاح وحطينا هالأثول بدال، حسافه والله. يحدث بوطلال نفسه، هذا قاعد يثبت عدم كفاءته يوم بعد يوم.

"آنه موافق على إللي قلته، منطقي وسليم. إبتدوا على طول" يطلب منه بوطلال.

"بوطلال، إحنا جهاز واحد وطول ويانا حروة دوام كامل، چذي معناته راح نبات هالليلة إهني"

"إنزين شالمشكلة؟ مو أول مرة يا صلاح، الأوڤر تايم يعوضكم" يرد بوطلال.
"الأوڤر تايم" يرد صلاح بإسلوب تهكم وهو يرمق بوعبدالله.
يلاحظ بوطلال النظرات المتبادلة بين صلاح وبوعبدالله.
"إشصاير ما تتكلمون" يسأل بوطلال

"بوعبدالله إتفق مع المالية على قيمتها. قاصين خمس دنانير على كل ساعه هالشهر من الشباب" يرد صلاح، عبالك فلت مني، لا يبه تو الناس، يحدث نفسه.

"شنو !!!" يستغرب بوطلال "ليش وعلى أي أساس؟" يسأل بوعبدالله.
"والله يا بوطلال كانت في ظروف" يرد بوعبدالله

يؤشر بوطلال بيده طالباً من التوقف والسكوت. "صلاح، قول للشباب لا يحاتون، الأوڤر تايم راح يرد نفسه إذا مو أكثر، خلاص توكل إنت على الله، وخلك على أتصال".

"مشكور بوطلال، ما قصرت" يخرج من المكتب ويسمع بوطلال يقول لبوعبدالله "خلك بحاچيك"


إنتهى الجزء الثالث عشر
ويتبع في الجزء القادم