Tuesday, November 15, 2005

أحمدوه كوجاك – أحاديث من الصليبخات


أيام زمان، كل فريج كان لازم فيه شخص مشاغب

بفريجنا كان إلطيف المينون

الفريج إللي ورانا أحمدوه كوجاك، بس طبعاً أحمدوه قفط كل الشباب. أصلاً أهو إنولد وعنده أستاذية بالشطانة والشغب

المسمى كوجاك حصل عليه لما حلق مره من المرات ع الزيرو، يعني موس

طبعا ما في داعي أقول عن الفشل الدراسي، وحتى الإجتماعي

وآخرته كان بالمركزي. ويمكن لسوء حظ العراقيين إنهم لما أطلقوا المسجونين، إن أحمدوه كان وياهم

كل ليلة من ليالي الغزو المشؤوم، طاخ، وله صوت طلقه، فإذا بكل أهل الفريج ومن بيوتهم وبصوت واحد: أحمدوه الله لا يبارك فيك، هذا وقته

دوريات عراقية وتفتيش تالي الليل، وله أحمدوه سادحله عراقي من الجيش الشعبي. طبعاً أهو مسويله مقاومة خاصة فيه

طبعاً وبعد التحرير، عفو شامل، أهو ما إرتاح بالحرية، رد مكانه الطبيعي

المراد، أستاد ع ، كان أحد الجيران ومدرس بالمدرسة الإبتدائية. واحد زقرتي مع وسامه بصراحه، وآنه أبصم بكل أصابعي، بذاك الوقت كل بنات الفريج والفرجان إللي حوالينا مغرمات فيه

المهم إستاد ع ، أيام السبعينات، سيارته بي أم دبليو خضره وكله مطيح يا بالبلاجات أو شارع الخليج مقابل المستشفى الأميري مع ربعه

سيارته شغل عدل، مركبله أربع كشافات، وكل شي، المهم سيارته كانت مميزة بصراحه

طبعاً أحمدوه كوجاك لازم يتحرش

ذاك اليوم الظهر، وله فجأة سيارة الأستاد ع مبيوقه، كشاف مختفي وشعار البي أم دبليو

عيال الفريج، طبعاً كانوا مخترعين بس شافوا أحمدوه وهو يبوق الكشاف

إستاد ع: حجية ولدك بايق السيارة
الأم: إنتو كلكم على ولدي، أي شي يصير بالفريج بلشتوه
إستاد ع: حجية الجيران شايفينه
الأم: كلهم يكذبون

ولدها الثاني ياي وراكب القاري

إستاد ع: إنزين، الجيران يكذبون، وآنه أتبلى عليه، إنزين هذا شنو

ويأشر على قاري ولدها وله مركب عليه كشاف و شعار البي أم دبليو ملصق بتيب لاصق

الأم: وي لعلك الموت أحمدوه، الله ياخذك، فشلتنا وقصيت ويهي جدام الناس

طاخ

وله طراق حق ولدها، الولد يبكي

الأم: من وينلك هذا

ولدها: آآآآآآآه، قاعد يبكي، أحمدوه ركبه على قارييي


أحمدوه كوجاك، علامة فارقة في تاريخ فريجنا، يا ترى وينه فيه




9 Comments:

Blogger Zaydoun said...

انزين ما قلت لنا شنو اللي وداه المركزي

9:47 AM  
Blogger q80_demon said...

إذا وهوه بدايته بالمدرسه بواق إكسسوارات السيارات لا و اشكره جدام ربعه، عيل على كبر شيبي يصير؟
الحقيقه مؤهلاته نجدها عند بعض أعضاء مجلس الأمه، لكن يمكن الحظ ما ساعده!

10:27 AM  
Blogger forzaq8 said...

ما عفس غرناطه إلا عيال صليبيخات

11:51 AM  
Blogger nanonano said...

صح...ليش دخل المركزي؟

12:22 PM  
Blogger esetch said...

الحقيقة سبب دخولة المركزي أنباء متضارة

ولكن هناك خبر يمكن تصديقه ألا وهو النصب والإحتيال وشيكات

Forza
بصراحة أنا أؤيد كلامك ولكن الملامة على عيال غرناطة من قالهم يجاورون صليبيخات

demon
على فكرة أهو هب ريح ولما تطلب منه شي إذا يقدر على شي يسويه

بس قول له نبيك بهوشه، يوم السعد عنده

1:49 PM  
Blogger Shurouq said...

lol
مو كاسر خاطري إلا اخوه

4:32 PM  
Blogger NYchick said...

lol
شلون وينه؟ بعد انت عارف رد مكانه الطبيعي

4:45 AM  
Blogger esetch said...

مصيبتنا بصليبخات إن عندنا الكثير من هالعينة

على سبيل المثال وليس الحصر

جبور بو ضروس

صبيح الصايع

حمود غوار

الناي بو زلغة

8:02 AM  
Blogger كله انسى said...

لوووول مسويلكم اكشن بالفريج :)

8:29 AM  

Post a Comment

<< Home