تعويذه ثانوية الدوحة صلوح الحول – أحاديث من الصليبخات

العزيز بومريوم صاحب البلوغ الراقي غرافيكا، ملهم رئيسي للكثير من المواضيع. أثار يوم أمس أو قبل أمس مسألة الوسم. وقال في إحدى البوستات إن وسمه الخاص أهو ألفريد أي نيومان، تعويذة مجلة ماد الشهيرة.

بصراحه ثانوية الدوحة تعويذتها صلوح الحول.

صلّوح الحول، مع إحترامي الكامل لمن يعانون حالة الإحولال في العين، ولكن طنازة الكويتيين إللي ما خلوا أحد بحاله، كان من المعمرين بثانوية الدوحة بمنطقة الصليبخات.
طبعاً أهو له عام دراسي مختلف بتواقيت خاصه فيه. فمثلا عيب عنده إنه يداوم يوم السبت، ما أدري يهودي وإلا أيش. اليوم إللي يداوم فيه يوصل الحصة الثالثة، لا ويجيب معاه كتبه وكشاكيله. طبعاً لا الكتاب مال المادة ولا الكشكول بعد، وأغلب الظن إن الكشكول مال أولت العام إذا مو كشكول أخوه. عرفتوا الصورة.

طبعاً عدم حضوره أهون على الإدارة المدرسية والمدرسين والطلبة. كله مسوي مشاكل. ذيك السنة تهاوش مع واحد من الطلبة، سواه ثلاثية، هوشه ثلاثة أيام، كل يوم بعد الهده. حشا مسلسل.

المهم آخر سوالفة إللي عقبها ما شفناه موليه. بسبة هوشته مع أحد المدرسين. الناظر، الأستاذ صالح، سِمِيّه، الله يذكره بالخير، قرر يفصله.
راح صلوح علبو بيتفاهم مع الناظر، ولا أثاري لاحق الناظر بالمكتب يبي يطقه. إلحين مو مكفيه المدرس، بيكمل عالناظر. المهم صراخ وأصوات، الفراريش إمسكوه قبل لا يحذف الكرسي عالناظر. فصل نهائي.

بعد نص ساعة ولا طاق الطوفة وراد وعلى طول صوب غرفة الناظر. ما لقاه.

ولا دخان من غرفة الناظر ومطافي. الملعون صب بنزين على باب غرفة الناظر وشب الولاعة، بقى إشوي بنزين بالبطل، جان يصبه على غرفة الوكيل، يالله إهي خربانه خربانه.

بس تخيلوا وياي لو كان صايد الناظر بمكتبه. جان إلحين صاير باربكيو.

آنه متأكد إن أغلب المدارس فيها صلوح الحول. بس مثل صلوحنا ما أعتقد في.

وبعدين يقولون شايل على الصليبخات.