لا أراكم الله مكروهاً بعزيز

بالأمس القريب رجعت من مدينة دبي. بصراحة كنت بالسابق أندهش من التطور سواءص العمراني أو باللوائح إللي تتكيف لتناسب التطور من جهة أو لحل معضلة من جهة ثانية.

ألحين ما قامت تدهشني، لأني كل ما أروح لها فيها شي يديد. خلاص إنتهينا كل يوم شي يديد

عيني عليهم باردة ومزيد من الإزدهار إن شالله

ولكن الواحد ما يقدر إلا يقارن مع إللي عنده، وإلا إشلون يندهش مثلاً

أول ما توصل المطار، الله أكبر، النفس للسما. لا يترقون حاطين لي بنات بالجوازات. إشوية يهال. والله وآنه راد من إحدى السفرات وله وحده من الجمارك قاعده تصارخ وبشكل طفول إللي الكل مستغرب ومندهش من الموقف "آنه إللي طلعت الأولى عليكم، كا بو فلان يقول، آنه الأولى ......" وغيرها نمن الحركات الخفيفة. والعالم قاعدين يطالعونها وضحك. لا وله الشرطي إللي قاط البريهه ومبين الصلعة (مع الإحترام) وفاتح الصدر لاحقها :إي إي إهي الأولى، شوفوا شوفوا خل أراويكم" والحلوات هدون مكانهم والعالم وراحوا وراه عشان يشوفون النتايج. والله مسخرة

بالردة من دبي، بصراحة إنتبهت للأجنية إلي بالجوازات، قلت أكيد يايبينها عشان الأجانب ، كفو والله إي جذي التطوير هذي واجهة البلد، يمها وحدة كويتية الظاهر، نص طن كحل بالعين ومركبه تلسكوب على راسها عشان تسوي بكلة ورانية بدال قوطي الروب، المهم جدامها وحدة هندية جان تقوم تحذف جواز الهندية عليها آنه قلت طيرت عينها. صج وقاحة وقاة أدب وتربية. يعني عشان كونها هندية تتصرف بهالطريقة.

معلهش قلت يمكن تصرف شخصي، وله بعدها بيومين ذكرت السالفة لأخ عزيز، قالي إسكت ما دريت، صادو وحدة مصرية تطلع المطلوبين بـ 1500 دينار للواحد، لا وبيوظفون أبناء المطلقات واللي آبائهم غير كويتيين بالشرطة، من قلة عيال البلد. ألحين عيال البلد حاميها حراميها إقروا الراي العام وقضية المباحث هالدور على الباجين. رحنا وطي

على طاري سالفة مباحث العاصمة ومبارك الكبير، جريدة الراي مسوين منها سالفة يعني أهم إللي إكتشفوا السالفة وبالبنط العريض، إما صاحبنا لما صرح للأمريكان وقال بالطقاق بالديرة أهم شي فلوسي عدت من غير تحقيق يالله ويبون تطوير

ترد الديرة وله معفوسة

مسجد ولا معبد ولا معتقل

يا جماعة من باب الحرية ومن باب الإعتراف بأدب هالجماعة وحبها للكويت والأهم من باب الدستور إللي المفترض النواب يقسمون بحمايتة وصيانتة

لا يطلعللي هذاك ويقول عنهم كفرة ملحدين، طيب الناطق بإسمهم يقول إحنا نشهد بوحدانية الله وإن النبي محمد رسوله ، بس جماعتنا وين يصدقون طالما إنت مو على ملتي، إنت كافر زنديق ملحد هندي ليبرالي بيزنطي ... إلخ من المسميات

بس كله بصوب وهذاك إللي طالع بالجريدة ومسماه الأمين العام لجمعية حقوق الإنسان على ما أظن، البهرة ليسوا كويتيين فما لهم حقوق...... خوش جمعية حقوق إنسان

إما المجلس البلدي فيضحك، يا أخي المفترض فيكم مجلس فني مو تشريعي إشلون تعارضون وشنوا الأسباب

ولكن ضحكني السبب إللي متمسكين فيه بعضهم، أهالي العارضية مو راضين

لما كانوا يبون يسوون مكانهم بحطين قلتوا الأهالي مو راضيين، إقتنعنا غصب وبلعناها
ألحين تقولون لي العارضية، إشدخل أهالي العارضية بالعارضية الصناعية، العامل المشترك الوحيد أهو الإسم، العارضية لا أكثر

يبه أقولها لطائفة البهرة وأييبها لهم من الآخر طالما إنكم شيعة مالكم أمل

زين ما سووكم فرس بعد

على طاري الفرس

آنه مو قادر أفهم العداوة القوية بين ولد الهدلق إللي يكتب بالوطن وبين الإيرانيين - عفواً الفرس
حاط دوبه دوبهم. طيب إحنا ألحين تأكدنا من مقالاتك - عشان لآ أتحول للنيابة - إنهم مو خوش ناس ويبون الدمار لنا فمن المفترض هالأمر متروك الآن للقيادة السياسية
يا أخي حول على جماعة ثانية ألحين حرام عليك عند عمود إشعرضة بجريدة يومية وهادر المساحة على الإيرانيين

عاد إشدعوه الإيرانيين هامهم مقالاتك، يا أخي طيب إكتب عنهم بس عاد حلل موقفهم مثلاً عطنا سيناريوهات الحرب إذا قامت بينهم وبين الأمريكان مثلاً مو بس سب، يعني تبي تصير مثل فؤاد الهاشم وحزب الله



معلهش توني راد من السفر وبطيت راسكم، أدري ما عندي موضوع محدد بس إهي خواطر

ولكن أرد على سالفة ديرتي

الديرة في مرحلة إحتضار يا الربع وبديت فعلاً أفقد الأمل

لا حول ولا قوة إلا بالله وإنا لله وإنا إليه راجعون