Wednesday, November 29, 2006

مبروك إنت ربحت المليون



في الفترة الأخيرة كثرت تلفونات البنوك لعملائها تحثهم على إستغلال المزايا المقدمة من البنك لهم

إذا أخذت قرض تدخل السحب ويمكن تربح ويكون القرض ببلاش
يبيله لامبرجيني
حول راتبك ولك راتب مدى الحياة
حالة الطوارق
وغيرها وغيرها

قبل كم يوم، وبالتقريب الساعة 12:30 بعد الظهر

البنك (موظفة): ألو مساء الخير، السيد إستش
آنه: إي نعم
معاك فلانة الفلاني من البنك الفلاني و .....
آنه وبصوت عالي وصراخ بوسط المواقف: مو معقوووول آآآنه ربحت المليون ، ماني مصدق ياربي، أحمدك وأشكر فضلك يا رب. لك هدية إمية ألف دينار، قمت أقول للموظفة

الله وكيلكم صراخ وضحك الموظفة ما إنقطع لنصف ساعة تقريباً وبشكل هستيري، لا بخلفية الصوت ربعها، فلانه علامك إشصار، يسألونها

الموظفة: لا أخوي (لين إلحين تتكلم وتضحك) آنه آسفة بس إنت ما ربحت المليون

مسوي روحي مصدوم

آنه: إشلون، آنه حلمان البارحة بالمليون، وعيني الشمال من الصبح ترف جنه كمك الفورويل درايف ما البرادو. ...، آنه جذي قمت أحاكيها، دايماً حظي مزفت، ... بس تعالي، عيل ليش داقة علي بس عشان تكدريني

الموظفة: لا يا أخوي بس إنت عميل مميز ومن المجموعة الذهبية و ....

آنه: لحظة، لحظة. الإسبوع الطاف واحد من البنك داق علي، وإنت عميل مميز ومن المجموعة الذهبية ويبي يورطني بسلفة عشرة آلاف دينار إنتي إشتبين تورطيني في

الموظفة (تضحك): لا يا خوي إحنا بنعرض عليك خدمة الإس إم إس ببلاش من البنك. العملاء الثانيين يدفعون إفلوس للخدمة. ها إشرايك

آنه: ما دام ما أدفع شي ما عندي مانع أي خدمة ثانية

الموظفة: لا شكراً لك وإن شالله تربح المليون

آنه: عاد هاذي يبيلها معجزة

الموظفة: آسفة ما فهمت

آنه: أصلاً آنه مو مشترك بحساب سحب المليون، إشلون راح أربح

ما أسمع إلا ضحك هستيري مرة ثانية

6 Comments:

Blogger q8_shabab said...

كل بنوكنا صارت من هلنوع

بس ان هدية اشتراك! ابخدمة! ال ! اس ام اس ! و الله انك محظوظ؟!؟

1:04 PM  
Blogger LiL ALiEN said...

لا ابشرك .. بعد اللامبرجيني صار يبيله اوستن مارتن


بس بصراحه بديت احسدك .. اس ام اس مره وحده وبلاش ؟؟؟؟؟؟؟؟؟؟ والله حظ

5:54 PM  
Blogger NYchick said...

looooooooool
انت رهيب حدك

5:57 AM  
Blogger ولاّدة said...

إشتبي بالمليون؟
ما راح تجر عليك إلا العين
وبالكويت نص المقابر -اللهم يا كافي - حسد

11:39 AM  
Blogger Diver said...

حلوة
الصراحة حلوة

الا لو منها جان رقمتك

2:36 PM  
Blogger Q8 Disaster said...

انطر عليهم جم سنه بيحطون الجائزه قطعة ارض 1000 متر على القمر وقول دزاستر ماقالها :)

11:00 AM  

Post a Comment

<< Home