Tuesday, November 21, 2006

أحاديث من الصليبخات – ثانوية الدوحة

نزولاً عند رغبة بومريوم وإحتفالاً بعودته الميمونة الظافرة (وراح أحاول أكتب قصة قصيرة في مرة من المرات عن هالشي) سنعود للكتابة عن الصليبخات

وطبعاً إللي يعرف الصليبخات لازم يعرف ثانوية الدوحة خصوصاً وإنها خرجت أجيال من الفطاحل وأصحاب الهمم وطبعاً هناك جانب غير مشرف ما راح نتكلم عنه، الستر زين

وهذا قبل التقسيم وتحويل الصليبخات إلى دويلات وإنشاء المنطقة التي تطلق على نفسها إسم الدوحة إللي إستقلت عن الوطن الأم

المراد، طبعاً إللي يعرف موقع الثانوية ( آخر المنطقة بالفعل) يدرك المسافة ما بين الثانوية وقطعة إثنين إللي فيها بيتنا وعادة الشباب من سكان القطع الأولي يروحون ويجون من الثانوية بالتأشيرة وأي واحد يشيلهم ويوصلهم، ولكن آنه كنت غير، فالوالد الله يرحمه كان يوصلني من وإلى الثانوية وعلى ما قسم مثل ما يقول المصريين


المهم ذاك اليوم حر وموت والشمس طابخه روسنا، آنه والربع قررنا نجزرها مشية من الثانوية لبيوتنا. الوالد ما بين. وإلا إشوي وله سيارة الوالد تقرب علينا وشاخطة

حسينوه: إستش هذا مو الوالد يسألني

آنه: إي والله، منو هذول إللي وياه. يباااااااه أصارخ من قمة راسي

والشباب صراخ وتأشير، حجي إتش حجي إتش

أبد الوالد رافع الجام وشخط ويييششش

حجي، الله بالخير، آنه إهني. ... أبد الوالد راح. لا حول ولا قوة إلا بالله

يالله مشية وتأشير عسى الله يفرجها

وبعد فترة وبنص الدرب، وله لزمة بريك نلتفت وله الوالد بسيارته، يالله ركبو

هييييه صفقة وضحك. هلكنا من المشي

آنه: يبه الله يهداك من كنت مركب وياك

الوالد: إشدراني آنه حسبتهم إنتو ووقفت جان يركبون وما هقيت إنك مو وياهم إلا بعد ما وصلنا البيت تقريباً أنادي عليك وله واحد يرد علي، حجي من إستش إللي تدوره

آنه: يبه الله يطول بعمرك جان دققت وشفتنا

الوالد: شدقق، كلكم لابسن مثل مثل

الله يلعن أبو الزي الموحد



ملحوظة: الصورة بالأسفل لسفارة دولة الكويت بالصليبخات






15 Comments:

Blogger بومريوم said...

loool

حسبى الله على ابليسك:)
و الله و لهنا على سوالفك:)

9:30 AM  
Blogger بومريوم said...

ليش ما تجمع كل هل السوالف على شكل قصص قصيرة؟
جد مو غشمره

6:18 PM  
Blogger LiL ALiEN said...

اسئله بسيطه

هذي السفارة اللي اقدر اطلع منها فيزا قبل لا ادش جمهورية الصليبيخات؟

وكم تكلفة الفبزا؟ وكم مدتها

والسفرة كم تكلف؟ من تذاكر وفنادق؟

واذا بغيت فندق على الجبل كم سعره؟

هل توفرون فنادق مثل جزر المالديف نظام الاكواخ "للهني موونرز" في وسط البحر .. او وسط مواقف السينما؟

تتعاملون بالدولار .. ام بالذهب والالماس؟

10:35 PM  
Blogger esetch said...

بومريوم

على إيدك بس المشكلة ثلاثة أرباع الربع راح يزعلون. مو هاذي كلها سوالفهم. الله ياني عندي سوالف، تفشل ولكن المصيبة إللي راح يقراها راح يعرف هالأشخاص.

وبعد هالعمر،،، ومثلك عارف

مشعور على التواصل والدعم اللامحدود

8-)

إيلين

إللي يبي يجي الصليبخات مقر سفارتها بالخارج مكتب النائب خلف دميثير العنزي، الملك الغير متوج لمملكة الصليبخات العظمى

والتكت علينا والفيزا بربع دينار يا للرخص، وإذا أثبت إنك كنت من سكان الصليبخات سابقاً أو لك أقارب فيها فالفيزا بعشرة دنانير

والفنادق راهية

ملحق بيت أم عرفانو (نجمة ونص) -له مدخل خاص أو الطابق الثاني ببيت محمودو الساحر بس من غير مواقف سيارات

وطبعاً لا تنسى المواقع السياحية

سينما الصليبخات، محطة بنزين الجمعية، مضخة الماي مالت قطعة ثلاثة، دوار الإنتخابات، البيت الأبيض مقر سكن النائب خلف دميثير - الملك لاحقاً، سكن الأرامل والمطلقات بقطعة خمسة، وطبيعي مقبرة الصليبخات المركزية

زورونا مرة لن تنسونا بالمرة

على فكرة إيلين آنه كل ما بحط كومنت عندق ما أقدر

8:00 AM  
Blogger esetch said...

عندق = عندك

8:01 AM  
Blogger Q said...

لوول!!

يعني حالكم حال الصينيين ... كلكم نفس الشي

أنا مع بومريوم على اقتراح تجميع القصص

9:23 AM  
Blogger 3abeer said...

سوالفك عجيبه .. وهذا أول تعليق لي.. أعتقد

ما حالفني الحظ .. عمري ما زرت ولاية الصليبيخات.. بس ودي آخذ لي تووور هناك

في عندكم Tour Guides ؟

11:28 AM  
Blogger esetch said...

q

8-)

والله إقتراح بومريوم جميل ولكن مصيبة السوالف ما تنطبع مالي خلق نواب مجلس الأمة وإتهامات إفساد أخلاق الكويتيين، يعني كلش إحنا ملائكة

بس نشوف إشلون الظروف


عبير يا مرحبا بك بمدونتي المتواضعة

هيل إنتي طايفك وايد شغلات يبيلك تبدئين من الأول

أما بخصوص التور في الصليبخات فباص 105 على طريج المقبرة أحسن تور وخصوصاً بساعات الزحمة

والتور غايد أما صلوح الحول أو أم خلود بصيل بالبرايفت تور مالها - التيوتا الكراون الحمرا

1:21 PM  
Blogger LiL ALiEN said...

ليش ماتقدر تحط عندي تعليق؟ شنو يطلع؟

9:46 PM  
Blogger q80_demon said...

الله بالخير أخ إس-إتش
Please drop by my blog ;=D

7:59 PM  
Blogger NYchick said...

Hello esetch
Wallah I missed swalef 9leebee7'at ele taktebha :)
more please

8:04 PM  
Blogger شرقاوي said...

أكو بيرة بدون كحول في فنادق الصليبيخات؟

7:36 AM  
Blogger esetch said...

إيلين

دايماً الكونت يطلع بصفحة ثانية بس نفر بيينغ بوستد

ديمون

آي ديد

NYChick
حيالله من يانا

إنتي وينك من سنين

شرقاوي

القائمة مليانه
سفن أب بالباتكس
صمون قص مدخن من إكزوز وانيت
كوكتيل بالسبيرتو

إللي تطلبه موجود

بس ها عاد بالأماكن المخصصة لذلك (ورا جمعية قطعة ثلاث وبس)

8:21 AM  
Blogger 3abeer said...

wow, authentic ba3ad.
gives you a feel of what you're getting into.

راح أتنكر وأركب الباص .. أما بالنسبه للتور غايدز الله يعطيهم ألف عافيه

But I guess I'm gonna have to pass on the tour guides.

thanks ;)

10:29 AM  
Blogger q80_demon said...

بالنسبة للمشاريب - والعياذ بالله - إللي يبدو انها من إبداع بارتندر كان يشتغل بالوالدورف أستوريا والريتز هوتيلز، انا مع الأكل أحبذ تقديم شاتو دو-ميغد )١٩٤٥( - وسهرات الخميس يبيلها كنتكي وايل تيركي وياحبذا لو كان من غير سيكوتين

10:29 AM  

Post a Comment

<< Home