Tuesday, November 18, 2008

هلا فلان

أعترف بأني كثيراً ما أنسى الأسماء ولا يمكنني ربطها بالوجوه - الكبر شين حيل

لكن بالجهة الأخرى على الطرف إللي يقابلك ويحس بأنك مو ذاكره يعرف نفسه من باب رفع الإحراج. بس شتقول بالحبيب إللي يبي بس يحرجك كإنه يقول لك فيك خير إنساني ثاني مرة

الحوار التالي سمعته اليوم بين أثنين

الأول: الله بالخير فلان إشلونك إشلون أخوك إشلون فلان - الحبيب ذاكر كل العشيرة
الثاني: بخير الله يسلمك يا هلا إشلونك إنت
الأول: إنت مو متذكرني ... صح
الثاني: ويه إعتفس وبان الإحراج ... واللااااااااااه
الأول: إشدعوه مسرع ما نسيت ... ها ما تذكرت
الثاني: والااااااه
الأول: الله إلحين من صجك ما تذكرتني - وبصوت عالي إللي خلا الكل يلتفت صوبهم
الثاني: والاااااه
الأول: تذكر فلان
الثاني ويهه إعتفس زياده وودة يشق هدومه: ها ... إشدعوه إلحين ما تذكر فلان

يا معود خل يذكرك أول شي وبعدين يتذكر فلان

الثاني: والاااه

الأول: فلان الفلاني راعي الرود ماستر
الثاني صكت فيه الدنيا

الأول: إنزين تذكر فلان
الثاني - وكإنه ياله الفرج: إيييي ، إيييي
الأول: إنزين تذكر ولد عمه فلان
الثاني: ها .. إي أذكر
الأول: أنه إللي ذيك السنه جيت وياه لمخيمكم بالجمس، آنه فلان

الثاني: هللااااااااااااااا - أشوه يانا الفرج

لعنبوك طلعت روحه وروح إللي قاطين إذنهم ناطرين يعرفون منو إنت


Labels:

8 Comments:

Blogger nanonano said...

هاهاهاهاهاهاهاهاهاهاهاهاها

يا كره الذاكره

و عندي أخت ما شاء الله عليها

و أنا كلّه مفهيه

وايد فشله

9:40 PM  
Blogger يعقووبوو said...

عيل انا اسوي العكس
مرات ناس موشايفهم من اشهر او سنين

ايني ويسلم علي.. اسوي روحي ماعرفه. لما يزهق ويمشي d-;

6:37 AM  
Blogger بومريوم said...

تذكر واحد ينقال لة بو مريوم؟
موقعين انت معاه مذكرة تفاهم قبل كم سنة؟

11:27 AM  
Blogger esetch said...

نانو آنه حايشني ألزهايمر من يوم عمري 7 سنين ما أتذكر أحد إذا ما يعرفني بنفسه ... مصيبة والله وفشلة



يعقوبو
والله فكرتك مو هينه

بومريوم
أي بومريوم؟ ذكرني

8-))

الله يهداك إنت صورتك خاشها بالبوك

12:52 PM  
Blogger kstudent said...

هاهااااااي والله فصلة

الله لا يحطني بهالموقف

ولو اني كثير ما انحط فيه..

لإنه حايشني زهايمر مثل الأخ

اتذكر عمري 3 سنين وشربت بطل كلونيا من مالين اول

ف العقل لكم عليه شوي هههههههههههه

يعطيك العافية يا مدوناتي خوش موضوع

4:32 PM  
Blogger Um il sa3af wil leef said...

والله العظيم ضحكتني ..خاصه آخر جمله :)))

11:28 PM  
Blogger vancouver said...

لووووووووووووووووووووول



صج ما يستحي هالشخص

والله بلشه

حلاته لما بالاخيييييييييير
عرفه بنفسه
راد عليه وقايله


ايييييييييييييييه تذكرت
انت هذاك الغثيييييييييث
لووووووول

:P

2:06 AM  
Blogger joy said...

انا كلله اجذب واقووول اشدعوة ما اذكرج يازين ذيك الايام
طل
بس ولا الالوان اللي تطلع ابويهيي
هاهاهاهاهاهاهي



تحياتي انا جوي في معلووم

2:54 PM  

Post a Comment

<< Home