ألا ليت الشباب

أول أمسات راد من الدوام الساعة 8 المسا تقريباً. وماشي على الدائري الأول. مو من عوايدي أدوس بس الجو كان حلو وقرعتي يضربها الهوا

ولا فجأة السيارة اللي جدامي تتطوطح شمال ويمين. التاير تفسخ والله ستر ما حاشوا الطوفة وما رقعتهم.

المراد طبعاً الشهامة خذت موقعها والحماسة إزداد جرعتها

وقفت ونزلت

سلامات سلامات

ولا الحجية طالعة تبتسم وشكلها متوهقة

طبعاً صار لازم أبدل البنشر

غصب على ما حصلت عالجيك في الدبة (سوق واجف بكبره بالهدبة)

الجيك شكله كان فالت، ربع ساعة وآنه أركبه.

إلحين الظاهر السكر ضرب كل ما أجندس بحط الجيك بمكانه قاعد أدوخ. افا كلش مو وقته

ولا سيارة تصفط وثلاث شباب نزلوا

من غير مقدمات يقول الشاب إللي كان يسوق

"عمي إنت إستريح وإحنا نقوم بالواجب"

وقفت وآنه مصدوم ومن غير لا أحس ولا الشباب مخلصين وما تآمرون على شي ومع السلامة

الكل مشى ما عداي

قاعد أشوف روحي بالمنظرة وقمت أهلوس من الضحك على روحي

ما توقعت

"عمي"

هالكثر الكبر بان علي إللي قامو ينادوني عمي. صج مفرع والشيب تارس الراس، بس عمي. طبعاً يمكن الشباب من باب الإحترام وهم كانوا ذهب والله ، والله يحفظهم إن شالله

بس عمي. كنت متوقع يالحبيب يالأخو بس عمي... صدمة

زين إللي ما قال حجي

++++++++++++

الحبيب إللي عارف روحه

الوعد 3 أماكن

- مطعم باجه بهار بشارع عمان

- مطعم فطاير تاوة بشرق

- مصنع حلويات الشمالي بشويخ

غيرهم ما في